ඇඟිලි දිගු කරන්නන් වෙත ආද‍රයෙනි

සෙට් වීම් සෙට් එකේ අරමුණක් කියා හැඳින්වීමට යමක් නැත. එහි ලබා ගත යුතු යැයි සම්මත බලාපොරොත්තුවක් නැත. සමාජයේ නරක මුලිනුපුටා දැමීම, යහපත් ගුණධර්ම ඇති කිරීම, බ්ලොග් අවකාශය වඩා යහපත් කිරීම, නිර්මාණශීලිභාවය ඉහල නැංවීම, ගුණාත්මකභාවය වැඩි දියුණු කිරීම ආදීය සෙට් වීමට අවශ්‍ය නැත. අප එකතු වෙන්නේ මෙවැනි අරමුණක් ලබා ගැනීමට නොවන අතර කලින් සඳහන් කර ඇති අන්දමටම සෙට් වීම යන්න පමණක් අරමුණු කරගෙනය. අපේ පිරිස එක්කාසු කිරීමට දේශපාලනික අදහසක්, සමාජයීය චින්තනයක් හෝ වෙනත් දාර්ශනික බම්බුවක් අවශ්‍ය නොවේ. අවශ්‍ය වන්නේ නිවාඩුවක් සහ ගමන් ගාස්තු පමණි. සෙට් වීම ව්‍යාපාරයක් නොවේ. සෙට් වීම තුලින් ‍කොහේවත් යන උන්ගේ බ්ලොග් වල ගුණාත්මකභාවය වැඩි කිරීමට උත්සහ දරන්නේ නැත. අදහස් දැක්වීමේ නිදහස හෝ එවැනි සමාජ ව්‍යාපාරයක් සෙට් වීමේ නැත. මේ නැවත නැවත කියන්නේ මින් පෙර දැක නැති දෙයක් සෙට් එක තුල නැති බවත් මිතුරන් පිරිසක් එක්රැස් වීම හැර අමුතු දෙයක් එයින් බලාපොරොත්තු නොවිය යුතු බවත්ය. 

නමුත් පසුගිය කාලය තුල කතා බහට‍ ලක්වූ බ්ලොග් අඩවියක් වන "ඇනෝනිමස් ආතල්"හි පලවෙන ලිපි සම්බන්ධව හා එහි බ්ලොග් හිමිකරුවන් කවුරුන්ද යන්න සම්බන්ධව විවිධාකාර චෝදනා "සෙට් වීම්" වලට, "ෆිට් එකට" එල්ල වීමට පටන් ගැනෙද්දී අප කවුද, අපෙන් යමක් බලාපොරොත්තු විය යුතුද යන්න ගැන මේ චෝදනා එල්ල කරන්නවුන්ට අබ ඇටයකුදු දැනුමක් නොමැති බව අපි දුටුවෙමු. ඇනෝනිමස් ආතල් බ්ලොග් අඩවිය තුල මුල සිටම සෙට් එකේ ශෛලිය කොපි කිරීමේ වෑයමක් පවතින බව අපි නිරික්ෂණය කලෙමු. එය හිතා මතාම එහි කියවන්නන් හට එම කොපි කිරීම් උලුප්පා දැක්වීමට ප්‍රයත්න දරන බවද නිරීක්ෂණය කල හැක. නමුත් කවුරුන් කුමක් කලත් එය අපේ නිදහසට බාධාවක් නොවේ නම් වැඩි අවධානයක් යොමු නොකිරීම අපගේ සාමාන්‍ය සිරිතයි. තම තමන්ගේ හැරමිටි ඕනෑ ආකාරයට වැනීමට තමාට නිදහස ඇත. නමුත් ඒ නිදහස කෙලවර වන්නේ අනෙකාගේ නාසයේ අගිනි. සෙට් එක කොපි කිරීම අපේ වැඩක් නොව එය සිදු කරන්නාගේය.

නමුත් ඇනෝනිමස් ආතල් හිමිකරු සමඟ තිබෙන එදිරිවාදීකම් සෙට් එක පිටින් යවා සිඟිති ආතල් ගැනීමේ ප්‍රයත්නය දිග හැරීමත් සමඟ මේ පිලිබඳව නිහඬව සිටීමේ තේරුමක් නැති බව පෙනී ගොස් ඇත. සෙට් එක තුල විවිධ මත දරන්නන් සිටින මුත් සෙට් එක තනිව ගත් කල එක් මතයක් නියෝජනය කර ඒ පිලිබඳව පෙනී සිටිමේ අවශ්‍යතාවයක් දැනට පැන නැගී නොමැත. එසේම එවැනි මතවාදයක් සඳහා පෙනී සිටිනවානම් ඇනෝනිමස් ලෙස හැංඟී සිට ගල් ගැසීමේ ක්‍රමයක් අප විසින් අනුගමනය නොකෙරේ. ‍සෙට් වීම් සාමාජිකයින් තම තමන්ගේ අදහස් තම තමන්ගේ අදාල මංගත නම් වලින් තම තමන්ගේ බ්ලොග් අඩවි තුල පැහැදිලිව සටහන් කර ඇත. එසේ තිබියදී අඥාතව ලිපි ලිවීමේ අවශ්‍යතාවයක් තවදුරටත් පැන නොනඟින බවට යමෙකු තේරුම් ගත යුතුය. 

ප්‍රතිචාර මඟින් පැහැදිලිව ඇනෝනිමස් ආතල් යනු සෙට් එකේ "වැඩක්"/"‍ගේමක්" නොවන බව පවසා තිබියදීත් සෙට් එකටම සියලු දේ බැරකර දැමීමේ ප්‍රයත්නයේ වගකීම භාර ගත යුත්තේ කවුද යන්න පිලිබඳව පැහැදිලි අදහසක් අප සතුව ඇත. නමුත් එලෙස ඇඟිල්ල දිගු කොට අපට ලැබෙන දෙයක් නොමැත. තම තමන්ගේ මොළ පරිමාව අනුව බුද්ධි මට්ටම සීමා වීම පිලිබඳව එම පුද්ගලයාට, පුද්ගල කණ්ඩායමට හෝ අපට සිදු කල හැකි දෙයක් නැත. මේ එක එකා ලබා උපන් හැටියැයි සිතා අපගේ වැඩක් බලා ගැනීමට අප යොමු වන්නේ එනිසාය. 

සෙට් එකේ ක්‍රියා කලාපය පිලිබඳ යම් විවේචනයක් තිබේ නම් හැංඟි හැංඟි ආතල් නොගෙන ප්‍රසිද්ධියේ එම විවේචනය යොමු කරන ලෙස අපි ඉල්ලා සිටිමු. ඒ එසේ විවේචනය කිරීමේ සාධාරණත්වය පිලිබඳ විවේචකයාට මතක් කර දීමට හැකි නම් ඉතාමත් අගනා නිසාවෙනි. 

මේ එසේ විවේචනය කිරීමට ලක ලෑස්තිවන්නවුන්ට කරන නිල නිවේදනයයි. ඇනෝනිමස් ආතල් සෙට් වීම් මගින් පවත්වාගෙන යන බ්ලොග් අඩවියක් නොවේ. එහි පලවන කිසිදු ලිපියක වගකීමක් අප විසින් භාර ගනු නොලැබේ. එවැනි වගකීමක් අප පිට පවරා දමා ස්වයං චූන් ගැනීමේ ආසාවක් යමෙකුට තිබේ නම් මෙය කියවා බලා එය සිදු කරන ලෙස අපි ඉල්ලා සිටිමු. තම තමන්ගේ මානසික මට්ටම හඳුනා ගැනීමට එවිට ඔහුට/ඇයට හැකි වනු ඇත. 

බොන්නේ අපිය....බොන්නට සෙට් වෙන්නේද අපිය....බීලා වැටෙන්නේද අපිය....කන්නේද අපිය....කන්නට සෙට් වන්නේද අපිය....කාලා නන්නත්තාර වන්නේද අපිය..

ඉරිසියා කරන්නේ උඹලාය..අපිව දැකලා යලිත් සෙට් වෙන්නේද උඹලාය..